Тайваний Цэргийн Нэгдсэн Эмнэлэг (Tri-Service General Hospital)-ийн багийг ахлан Монгол улсад хүрэлцэн ирсэн тус эмнэлгийн Ерөнхий захирал Хунг И-Рэнь 2024 оны 4-р сарын 29-ний өдөр Улсын Нэгдүгээр Төв Эмнэлэгтэй хамтран “Амилуулах суурь тусламж, хөх код идэвхжих үеийн арга хэмжээ” сэдэвт хурлыг зохион байгуулав. Тус хуралд хэд хэдэн эмнэлгийн мэргэжлийн эмч, сувилагч нар хамрагдсан бөгөөд хурлын үеэр эмнэлгийн ажилчдын амилуулах суурь тусламжийн талаарх мэдлэг, ур чадварыг сайжруулах, мөн зүрх судасны мэс заслын орчин үеийн технологийн талаар лекц сургалт тавиж, хурал амжилттай болж өндөрлөлөө.
Тайваниас Монгол улсад суугаа Төлөөлөгч Николай Ван хэлсэн үгэндээ, “Тайваний Цэргийн Нэгдсэн Эмнэлэг нь удаан хугацааны турш олон улсын эмчилгээ үйлчилгээг чухалчилж ирсэн бөгөөд тус Төлөөлөгчийн газрын дэмжлэгтэйгээр Монгол Улсын зургаан улсын эмнэлэгтэй хамтран ажиллаж эмнэлзүйн зааварчилгаа өгч, Монгол улсын цөөнгүй иргэдэд тусламж дэмжлэг үзүүлж Тайвань Монголын эрүүл мэндийн харилцаа, хамтын ажиллагааны нэг тод жишээ болж өгч буй явдалд талархаж байна. Тайвань орон Монголын ард түмний эрүүл мэндийн төлөө “Тайвань тусалж чадна, Тайвань тусалж байна” (Taiwan can help and Taiwan is helping) гэх үзэл санааг хэрэгжүүлэн цаашид ч хамтран ажилласаар байх болно.” гэв.
Улсын Нэгдүгээр Төв Эмнэлгийн Ерөнхий захирал Б.Хишигжаргал хэлсэн үгэндээ, “Тайваниас Монгол улсад суугаа Төлөөлөгчийн газраар дамжуулж 2022 онд Тайваний цэргийн нэгдсэн эмнэлэг, Тайваний Юү-Шин Биомедикал ХХК-тай хамтран хиймэл оюун ухааны тусламжтайгаар зүрхний цахилгаан бичлэг уншдаг аппарат (AI ECG)-ыг хандивласан ба үүнд талархаж буйгаа илэрхийллээ. Мөн хамтын ажиллагаатай эмнэлэгүүдтэй хамтран тус эрдэм шинжилгээний хурлыг зохион байгуулж байгаа бөгөөд манай эмнэлэг нь гадаад харилцаагаа хөгжүүлэх, эмч, мэргэжилтнээ сургах чиглэлд ихэд анхаарал хандуулан ажилладаг. Энэ удаагийн эрдэм шинжилгээний хурлаар Тайвань, Монголын эрүүл мэндийн ажилтнуудын чадавхийг сайжруулна гэдэгт итгэж байна.” гэв.
Цар тахлын үеэр Тайваний Цэргийн нэгдсэн эмнэлэг нь Улсын нэгдүгээр төв эмнэлэгтэй хамтран цахимаар эрдэм шинжилгээний хурал зохион байгуулж байсан бөгөөд Монгол Улсын хэд хэдэн эмнэлгүүдтэй хамтран ажиллах санамж бичигт гарын үсэг зурж тус санамж бичгийн хүрээнд хамтын ажиллагаатай эмнэлгүүдийн эмч, сувилагч нарыг Тайваньд сургаж, олон улсын стандартад нийцсэн хиймэл оюун ухааны тусламжтайгаар зүрхний цахилгаан бичлэг уншдаг аппаратыг хандивласан бөгөөд тус эмнэлэгүүд дээр сургалт, семенар зохион байгуулж, хиймэл оюун ухааны системийг нэвтрүүлсэн байдаг. Энэ нь Тайвань, Монголын эрүүл мэндийн харилцаа, хамтын ажиллагааны нэг том жишээ юм. Тус эмнэлгийн ерөнхий захирал Хунг И-Рэнь хэлсэн үгэндээ, “Тайваниас Монгол улсад суугаа Төлөөлөгчийн газрын тусламж, дэмжлэгт талархал илэрхийлж энэхүү завшааныг ашиглан Тайваний анагаах ухааны зөөлөн хүчийг Монгол улстай хуваалцаж, Монгол улсын мэргэжлийн эмнэлгийн боловсон хүчний холбоо харилцаагаар дамжуулан Тайвань Монголын эрүүл мэндийн хамтын ажиллагааг илүү үр дүнтэй сурталчлан дэлгэрүүлнэ гэж найдаж байна.” гэсэн юм.
